البَكْمَةْ
*****
سْلَامْ الْوَقْتْ الْجَافِي
سْمَعْ لْسَانْ الْبَكْمَةْ
تَحْكِي بَالجْهَارْ
فَلُّوسْ أصْفَرْ خْرَافِي
نْحِيلْ لَبْدَانْ نَغْمَةْ
فْصُوتُو دْلَغْيَارْ
*****
كُوكُو كُوكُووَالْ … لَا بُو لَاخَالْ
فَبْلَادْ لَغْوَالْ … طْرِيقِي طْوِيلْ
يْتِيمْ الْحَالْ … تَايَهْ جَوّالْ
نْكَابَدْ لَهْوَالْ … جِسَمِي عْلِيلْ
*****
بِيضَةْ فَقْسَتْ فَفْيَافِي
شَمْسْ لَكْوَانْ وَنَجْمَةْ
تَحْظَنْ وَامْطَارْ
قَشَّرْتْ لَوْكَرْ بَكْتَافِي
لا احد يبان لقمة
فجوعي تكبار
*****
كُوكُو كُوكُو وَانْ … فَتْحُوا الْبِيبَانْ
نَهْجَرْ لَمْكَانْ … مَالِي حْنِينْ
بُويَا فَوْطَانْ … يْقيِمْ الآذَانْ
نَلْقَاهْ فَرْحَانْ … لْأَصْلِي قْرِينْ
*****
بْلَقْدَمْ جْرِيتْ الْحَافِي
نَسْلَكْ طُرْقَانْ الظَّلْمَةْ
تَدِّينِي للنْهارْ
السْمَا تَبْرَقْ بَعْوَافِي
دْخَلْتْ طَمْعَانْ فَالرَّحْمَةْ
لْسُوقْ بَلَجْوَارْ
*****
كُوكُو كُوكُوَاهْ … لَبْغَلْ مَاعْلَاهْ
الذِّيبْ فَبْلَاهْ … الدْجَاجْ سْفِيهْ
رَبْطُونِي حْدَاهْ … شْرَانِي لَعْشَاهْ
يَذْبَحْنِي بَمْضَاهْ … هْرَبْتْ مَنْ يَدِّيهْ
*****
رْجَعْتْ خْرَجْتْ مْفَافِي
بَينْ السِّيقَانْ زَّطْمَةْ
تَسْحَقْنِي كِلَغْبَارْ
رَهْبْتْ النْسَرْ فَجْوَافِي
يَنْقَضْ عَجْلَانْ لَقْمَةْ
نْصِيرْ فْمَنْقَارْ
*****
كُوكُو كُوكُواتْ … تْخَبِّيتْ نْبَاتْ
جَاتْ الْحَيَّاتْ … تَعْصَرْنِي لْقُوتْ
هْرَبْتْ فْظَلْمَاتْ … مُوكَةْ هَجْمَاتْ
الرَّعْدْ اصْوَاتْ … نَرْجَى نْمُوتْ
*****
لَفْجَرْ بْصَوْتْ سْلَافِي
فَرُّوجْ فْآذَانْ الرَّحْمَةْ
بُويَا فْلَجْوَارْ
قْصَدْتُو نَعْتَرْ فَطْرَافِي
صَدْنِي زَرْبَانْ وَصْمَةْ
حْسَبْنِي أَوْ عَارْ
*****
كُوكُو كُوكُو وَاْق … سْخَفْتْ فَزْقَاقْ
هَزُّونِي رْفَاقْ … لْمَطْمُورَةْ فْضِيقْ
شْبَعْتْ تَبْوَاقْ … عَايَشْ سَرَّاقْ
مَاتَتْ لَشْوَاقْ … تْعَلَّمْتْ النْهِيقْ
*****
بَاللُّطْفِيَةْ وْزَنْتْ قْوَافِي
سِيرَتْ صَبْيَانْ فْظَلْمَةْ
فَلُّوسْ فَنْظَارْ
الْعَلَمِي بْشِعْرْ شْرَافِي
نَرْجَا الْمَنَّانْ رَحْمَةْ
تْعَمْ لَمْصَارْ
*****
الشاعر عبد الجبار المنوني
مراسلة مكناس
سلامي المصطفى