فرحي اللي كارحني للزجالة والشاعرة ايمان زهير

قصيدة
فرحي اللي كارحني
إيمان زهير
*********
بكي عليا يا روحي
بكي.
بكي ,عليا ونوحي.
راه فرحي
سمح فيا
واطلق سراحي.
بوحي يا روحي
بوحي
بلي فيك
عسى تبرى جراحي
………………………..
بكي عليا ياروحي
بكي
بكي عليا ونوحي
راني غشيمة مغشمة
شربت من كاس
أحزاني
فرحة
مدرحة
نزلات دموعي
تغلي عافية
حركت لكليب
وقطعت حشايا
ولمطت الكبدة
فشواك كارحة
……………………….
بكي عليا يا ورحي
بكي
بكي عليا ونوحي
راه بح بوحي
السكات لبسني
وغطاني
ملي عطفت قلامي
عكر لساني
و وراقي هاربة
قدامي
ومن وراااااااااايا
شلا حرووووووووف
تابعني
وحرفي
لي يفرحني
مالقيتو
سخا بيا ونساني
……………………….
بكي يا روحي
بكي
بكي يا روحي
ونوحي
راه من يوم
راحت راحتي
ضاعت فرحتي
ويامي فدروب
لعمر حيرانة
ظلي بعد مني
خلاني تحت الضو
عريانة
مرايتي رفيقتي
عوجات وجهها عليا
نساتني شكون أنا
………………………….
بكي يا روحي
بكي
بكي ياروحي
ونوحي
راه الضحكة يهاتت
عيوني بالدموع
سالت
ولهموووووم
حالفة فيا ما تهنا
فظلام دواخلي
دفنت الماضي
عسى تهرب المحنة
وحدها الهضرة
مقابلاني
هضرة مثقلة
بالمعاني
تكويني
من كل حرف جمرة
شلا هضرة
واش من هضرة
لاصقاني
ساكناني
بياكتسلى
بيا تتفلى
عاجبها حالها و حالي
………………………….
أنا مزااااااوكة
يا روحي ديني
نجيني مني
هربيني
ودخليني ف حما
حلامي
خبيني
من اوهامي
يمكن تمة نرتاح
ونلقى فرحتي
ف أحضاني
كتسناني